Gəncə şəhər Təhsil İdarəsində bu il Dövlət İmtahan Mərkəzinin keçirdiyi qəbul imtahanının I mərhələsində yüksək bal toplayan abituriyentlərlə görüş keçirilib. Görüşdə şəhər Təhsil İdarəsinin müdiri Zakir Hüseynov, orta ümumtəhsil məktəblərinin rəhbərləri, qəbul imtahanlarında yüksək bal toplayan abituriyentlər iştirak ediblər.
    Şəhər Təhsil İdarəsinin müdiri Zakir Hüseynov zəka sahiblərini qazandıqları uğura görə təbrik edib. Bildirib ki, ölkəmizdə gəncərin inkişafı, onların yeni texnologiyalar, elmin yeni nailiyyətləri ilə yaxından tanışlığı üçün gözəl şərait və imkanlar yaradılıb. Təhsil ocaqlarımız kompüterlərlə təchiz olunub, yüksək təlim-təhsil şəraiti mövcuddur. O, Gəncə şəhərində təhsil infrastrukturunun yenilənməsi və maddi-texniki bazanın möhkəmləndirilməsi istiqamətində görülən işlərdən bəhs edib. Qeyd edib ki, 2015-2016-cı tədris ilinində 11-ci sinif məzunlarından 6 nəfər qızıl, 1 nəfər isə gümüş medala layiq görülüb. Ali məktəbə qəbul olan abituriyentlərdən 197 nəfəri 500-dən, 71 nəfəri isə 600-dən yuxarı bal toplayaraq yüksək nəticələr göstərib. Ümumilikdə isə 18 nəfər 650-dən yuxarı bal toplayıb. Bu il qəbul imtahanının I mərhələsində Gəncə şəhər ümumtəhsil məktəblərinin şagirdlərindən 48 nəfəri 600-dən yuxarı bal toplayıb. Bunlardan 9 nəfəri 670 baldan yuxarı bal toplayıb. Ən yüksək 700 balı isə 26 saylı məktəb-liseyin şagirdi Abdulla Əsgərzadə toplayıb. Qəbul imtahanlarında ən yüksək nəticəni göstərmək hər bir abituriyent,onun valideynləri, təmsil etdiyi məktəbin kollektivi üçün qürur hissidir.
    Görüşdə sevinclərini paylaşan gənclər çıxış edərək, təhsilə göstərilən diqqət və qayğıya görə Prezident cənab İlham Əliyevə minnətdarlıqlarını bildirib, gələcək fəaliyyətlərində təhsilə, cəmiyyətimizin inkişafına öz töhfələrini verəcəklərini vurğulayıblar.
    Sonda təhsildə göstərdikləri uğurlara görə abituriyentlərə Fəxri Fərman təqdim edilib.