Gəncə-Daşkəsən Regional Təhsil İdarəsinin tabeliyində fəaliyyət göstərən ümumi təhsil müəssisələrində insan hüquqlarının təbliği, şagirdlər arasında hüquq mədəniyyətinin formalaşdırılması və bu sahədə məlumatlılığın artırılması məqsədilə rəsm sərgiləri və müsabiqələr təşkil olunub.

        Tədbirlər çərçivəsində şagirdlər insan hüquqları, bərabərlik, tolerantlıq, sülh, ədalət və uşaq hüquqları mövzularında hazırladıqları rəsm əsərlərini nümayiş etdiriblər. Sərgilərdə təqdim olunan işlər şagirdlərin insan hüquqlarına dair baxışlarını, yaradıcı düşüncələrini və mövzuya münasibətlərini əks etdirib.

        Keçirilən müsabiqələr zamanı iştirakçılar insan hüquqlarının qorunması, hər bir insanın ləyaqətinə hörmət, bərabər imkanlar və hüquqi dəyərlərin cəmiyyətdəki əhəmiyyəti ilə bağlı fikirlərini bədii yaradıcılıq vasitəsilə ifadə ediblər.         Tədbirlər şagirdlərin yaradıcılıq qabiliyyətlərinin inkişaf etdirilməsi ilə yanaşı, onların hüquqi biliklərinin və vətəndaş məsuliyyətinin artırılmasına da xidmət edib.

        Sərgi və müsabiqələrdə nümayiş etdirilən əsərlər iştirakçılar və qonaqlar tərəfindən maraqla qarşılanıb, mövzu ətrafında fikir mübadiləsi aparılıb. Qeyd olunub ki, bu kimi tədbirlər şagirdlərdə insan hüquqlarına hörmət hissinin formalaşmasına, hüquqi maariflənmənin gücləndirilməsinə və vətəndaşlıq dəyərlərinin təşviqinə mühüm töhfə verir.

        Sonda fəallığı ilə seçilən şagirdlər mükafatlandırılıb, iştirakçılara təşəkkür edilib və gələcək fəaliyyətlərində uğurlar arzulanıb.