Nizami yurdunda Ticarət və Xidmət üzrə Gəncə Dövlət Peşə Təhsil Mərkəzinin I tədris korpusunun və şagird yataqxanasının əsaslı təmirdən sonra açılış mərasimi olub. Açılış mərasimində Gəncə şəhər İcra Hakimiyyətinin başçısı Elmar Vəliyev, şəhər rəsmiləri və ictimaiyyət nümayəndələri iştirak ediblər.

    Tədbirdə çıxış edən Gəncə şəhər İcra Hakimiyyətinin başçısı Elmar Vəliyev müstəqil Azərbaycanın qurucusu olan Heydər Əliyevin ölkəsi üçün gördüyü işlərdən danışıb. Elmar Vəliyev cari ildə MDB-nin Mədəniyyət Paytaxtı olan Nizami yurdunda həyata keçirilən layihələr haqqında geniş məlumat verib. Şəhər rəhbəri peşə məktəbinin kollektivini təbrik edərək onlara işlərində müvəffəqiyyətlər arzulayıb.

    Ticarət və Xidmət üzrə Gəncə Dövlət Peşə Təhsil Mərkəzinin direktoru Fazil İsmayılov qeyd edib ki, peşə məktəbinin binası 1966-cı ildən fəaliyyət göstərməsinə baxmayaraq, heç bir zaman təmir olunmayıb. Burada aparılan əsaslı təmir nəticəsində məktəbin binasının müasir və bu günün tələblərinə cavab verən səviyyəyə gətirildiyini deyən Fazil İsmayılov qeyd edib ki, hazırda məktəbdə 7 peşə - “Dərzi”, “Komputer ustası”, “Bərbər manikürçü”, “Dülgər”, “İnşaat materialları, konstruksiyalarının və məmulatların qəlibçisi”, “Biçiş-tikiş avadanlıqlarının operatoru, tikişçi” üzrə kadrlar hazırlanır. Direktor vurğulayıb ki, bu peşələr üzrə 154 şagirdə 8 istehsalat təlimi ustası, 16 nəfər pedaqoji və yardımçı heyət xidmət edir.

    Ticarət və Xidmət üzrə Gəncə Dövlət Peşə Təhsil Mərkəzinin şagirdləri Şəbnəm Məmişova və Günel Ələsgərova çıxış edərək onlar üçün yaradılan şəraitə görə Azərbaycan Respublikasının Prezidenti İlham Əliyevə və birinci Vitse-Prezident Mehriban Əliyevaya təşəkkürlərini bildiriblər.

    Məktəbin tikintisində əməyi keçən "Rövşən Oğuz Qrup"MMC-nin işçiləri - Aydın Atakişiyev və Pərviz Şükürov Gəncə şəhər İcra Hakimiyyəti başçısı tərəfindən "Fəxri Fərman" ilə təltif ediliblər.

    Lent kəsildikdən sonra məktəbə daxil olan Gəncə şəhər İcra Hakimiyyətinin başçısı Elmar Vəliyev və ictimaiyyət nümayəndələri sinif otaqları, idman zalı, kitabxana o cümlədən dülgər və tikiş emalatxanaları, şagird yataqxanası və s. ilə tanış olublar.