Aprelin 15-də Gəncə-Daşkəsən Regional Təhsil İdarəsinin tabeliyində fəaliyyət göstərən şagird sayı 151-500-dək və hazırda direktor vəzifəsi vakant olan ümumi təhsil müəssisələrinə direktorların işə qəbulu müsabiqəsinin test imtahanı mərhələsi keçiriləcək.

Test imtahanı mərhələsi Gəncə şəhər 28 nömrəli tam orta məktəbdə keçiriləcək. İmtahanın keçirilmə müddəti 80 dəqiqədir. Namizədlərə tənqidi oxu, riyazi və məntiqi düşünmə bacarıqlarının,  əmək və təhsil qanunvericiliyi üzrə biliklərin yoxlanılması məqsədilə ümumilikdə 45 test tapşırığı təqdim ediləcək.  Test imtahanı nəticələri təhlil edildikdən sonra keçid balı müəyyənləşdiriləcək. İmtahan saat 11:00-da başlayacaq.

İmtahanda iştirak edəcək namizədin imtahanın keçiriləcəyi binaya daxil olarkən şəxsiyyəti təsdiq edən sənədinin üzərində olmağı mütləqdir. Eyni zamanda namizədlər imtahan mərkəzinə imtahan müddəti başlamazdan 1 saat əvvəl yaxınlaşmalıdır.

Həmçinin direktorların işə qəbulu müsabiqəsinin test imtahanı mərhələsində iştirak hüququ qazanan namizədlərin əlaqə nömrələrinə bu barədə SMS bildiriş göndərilib. Qeyd edək ki, Gəncə-Daşkəsən Regional Təhsil İdarəsinin tabeliyində şagird sayı 500-dək və direktor vəzifəsi vakant olan ümumi təhsil müəssisələrinə işə qəbul üzrə sənəd qəbulu prosesində 133 nəfər namizəd iştirak edib.

Test imtahanı mərhələsində iştirak edəcək bütün namizədlərə uğurlar arzulayırıq!