14.11.2023
Eksternat qaydada imtahanların keçirilməsi
Əvvəlki illərdə ümumi təhsil məktəblərində oxuyub ümumi orta və tam orta təhsil səviyyəsini bitirə bilməyən şəxslər üçün 15 noyabr 2023-cü il tarixdən 15 dekabr 2023 -cü il tarixədək eksternat təhsilalma forması üzrə sənəd qəbulu həyata keçiriləcək. Eksternat qaydasında imtahanlar əvvəlki illərdə Gəncə-Daşkəsən Regional Təhsil İdarəsinin tabeliyində fəaliyyət göstərən təhsil müəssisələrində təhsil almış, lakin ümumi orta və ya tam orta təhsil səviyyəsini başa vura bilməyən şəxslərə şamil olunur.
İmtahanda iştirak etmək istəyən şəxslər sənədlərini təhsil almış olduqları ümumtəhsil məktəbinin tabe olduğu təhsil sektoruna təqdim etməlidir.
Tələb olunan sənədlər
1. Şəxsiyyət vəsiqəsinin surəti;
2. 3 x 4 ölçüdə 2 ədəd foto şəkil;
3. Tam orta təhsil səviyyəsi üzrə eksternat təhsilalma formasında imtahanlarda iştirak üçün (11-ci sinif üzrə ) müraciət edildiyi halda ümumi orta təhsil haqqında attestatın (şəhadətnamənin) notariusda təsdiq olunmuş surəti;
4. Oxuduğu təhsil müəssisəsindən neçənci sinfi bitirdiyinə dair arayış;
5. Hərbi xidmət haqqında sənədin surəti;
6. Gəncə-Daşkəsən Regional Təhsil İdarəsinin müdirinin adına ünvanlanmış ərizə.
Ümumi orta təhsil səviyyəsi haqqında attestat almaq üçün müraciət edən şəxslərin yaşı 16-dan, tam orta təhsil səviyyəsi haqqında attestat almaq üçün müraciət edənin yaşı 18-dən aşağı olmamalıdır.
Müraciət edən şəxslər buraxılış imtahanlarından öncə əsas fənlərdən ibarət aralıq imtahanda iştirak edirlər. Tədris dili rus dilində olan şəxslər əlavə olaraq Azərbaycan dili fənnindən imtahan verirlər.
Nəticələr Dövlət İmtahan Mərkəzi tərəfindən keçirilən buraxılış imtahanlarına kimi açıqlanır. İmtahanlarda uğur qazanmış şəxslər ümumi orta və tam orta təhsil haqqında sənəd (attestat) almaq üçün Dövlət İmtahan Mərkəzi tərəfindən ümumi və tam orta təhsil səviyyəsi üzrə keçirilən buraxılış imtahanlarında iştirak etmək hüququ qazanacaqlar.
